الهندسة و حب الهندسة

من الاشياء اللي بتخليني حزين جدا في اخر كام سنة, عدم تقدير طلبة العلوم و الهندسة لجمال و عظمة العلم اللي بين ايديهم, و عدم تقديرهم لقوة المعرفة اللي تحت ايديهم اللي معاهم او مفتوحلهم السكك بتاعتها.
الهندسة تحديدا بتدي للاشخاص قوة مرعبة جدا, و علم مرعب جدا بيكون تجميع لمجموعة علوم سوا, بهدف حل المشاكل و صناعة الاجهزة اللي بتساعد في تطوير البشرية, المشكلة ان طالب الهندسة بيدرس (ويشتغل) منغير ما يقدر القوة دي, ولا يقدر الجمال اللي بين ايديه ده, و ازاي انه فيه دقة و نظام مرعبين و ربط بين المجالات و العلوم سوا, كفيلة ان اي حد عاقل يقف دقيقة اجلال و احترام لعظمة الموضوع كل يوم

: مثال علي كده
اقل من 1% من طلبة الهندسة الكهربية بشعبها فاهمين اللوجيك ديزاين فعلا, مش فهم اللي يخليه يجيب امتياز في المادة, لا الفهم اللي يخليه يعرف المادة دي مبنية علي فرع كامل من الجبر و المنطق, اللي اتطور اصلا بسبب فلسفة ارسطو, و ازاي ان قواعد المجال ده ليها جذور في اعمق نظريات الرياضيات, و انه بالمبادئ دي بيكون حرفيا بيخلي رمال الصحراء تفكر
نفس ال1% دول فاهمين الصلة بين الكوانتم فيزكس و السيركتس و الالكترونيات و اللوجيك و البروسيسور و البرمجة و الابليكشنز و ازاي ان دراستنا المفروض بتعلمك تمشي وسط الليفلات دي من المعقد جدا (كوانتم) للسهل جدا (الابليكشنز) و ازاي ان المهندس يقدر بسهولة كل ما يتزنق يخترع طبقة جديدة من التجريد عشان يقدر يفكر و يبدع زيادة

: فيه زي مقولة في الاثر بتقول
“Engineering Gives Us God Like Powers”
بمعني ان ربنا لما خلق الدنيا, ساب من قوته او صفاته اثار في الارض, احدي الحاجات اللي اداها ربنا للانسان بس (عالاقل في حدود المجموعة الشمسية) كانت القدرة علي الصنع, القدرة اننا نحل المشاكل و نصنع الاشياء نفسها من تركيب الحاجات التانية, دي قدرة مش سهلة و مش حاجة يستهان بها

للاسف الشديد, كتير جدا من طلبة الهندسة مش بيحبوا الهندسة, مش بيفهموا ربط الاشياء ببعض, مش بيحبوا يحلوا المشاكل برا ورق الامتحان, مش بيقدروا يكونوا الا في وظايف ميديوكر ﻷنهم بيدوروا بس عالوظيفة مش انهم يمارسوا الهندسة نفسها و انهم يطوعوا القوة اللي في ايديهم, لو اي حد بص علي لايحة المناهج بتاعة اي مجال في اي كلية هندسة, هيلاقي علي مدار السنين الواحد بياخد مجموعة خبرات و حاجات متوصلة ببعض بروابط كبيرة, بس الاغلبية بصيرتهم اتعمت عن انهم يشوفوا الكلام ده و انهم يفهموا و يحسوا بالهندسة.
قد نقول ان ممكن يكون السبب النظام, قد يكون السبب بعض الدكاترة.. لكن ده مش السبب, السبب في الطالب او المهندس نفسه, انا مش محتاج نظام ولا دكتور بشكل معين عشان اتعلم اني احس بالعلم و احس بترابط المجالات سوا, و اقدر افكر في حلول المشاكل و اصنع حاجات فعلا تضيف للمكان حواليا

الدرجات حلوة و المذاكرة و التقدير حلوين حتي لو ملهمش لازمة في الشغل, و الشغل حلو برضه و جميل, بس مفيش اي لازمة لكل ده, لو الواحد معلمش نفسه و حاول يشوف الحقيقة ورا الاشياء و يربط النقط ببعض, وساعتها يحس انه يستحق لقب المهندس/الباحث/العالم..الخ

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

A WordPress.com Website.

Up ↑

%d bloggers like this: