الثورة.. مستمرة

في هذه الايام المباركة, التي توافق منذ عدة سنوات ايام قيام ثورة 25 يناير و حدوث تغيرات كبيرة في طريقة تفكيرنا, بعدها حصل سنتين من الفوضي الجميلة, و سنة زادت الفوضي فوضي و ركبت ناس عالثورة, و بعدها ماتت الثورة و انتهي كل شئ, الا ذكراها كل سنة في مثل هذا الوقت, بس يا تري, هل اصلا قامت الثورة؟

الاجابة العادية للشاب الثوري العادي انه طبعا الثورة قامت و دي اطهر ايام العصر الحديث و بلا بلا محفوظة كتيرة كده, لكن في رأيي المتواضع, الثورة مقامتش لسا اساسا, كل ده مجرد تمهيد, 25 يناير كانت شرارة, اتوجدت عشان تنور عقول الناس, و توريهم ان فيه ممكن يكون بديل للاوتوقراطية المطلقة الحالية حتي لو مش البديل اللي احنا بندور عليه, بس بصوا يا جماعة, ده ممكن يتغير, ممكن نصحي تاني يوم منلاقيهوش عادي, و لو شلنا الراس الكبيرة ده معناه اننا نقدر نشيل كل اللي تحته بسهولة شديدة, بس احنا معملناش الثورة لسا اصلا, كل اللي حصل في ال7 سنين اللي فاتوا, نصه الاولاني لحد ما الاخوان مسكوا البلد كان محاولات للثورة, و النص التاني اضحوكة كبيرة و مسرحية اسوأ من مسرحيات انا الكاتب بتاعها مثلا

الهتاف الاصدق في الثورة, و الوحيد تقريبا اللي بيثير الكهرباء في جلدي, هو هتاف بكرة الثورة تقوم ما تخلي علي الرغم من انه اتقال بعد ما رسميا الثورة خلصت او كانت شغالة حتي, الا انه معبر بصدق عن الحال الحاصل, ان الثورة لسا مقامتش اصلا, و انها لما تقوم بكرة, لن يبقي اي حاجة من الفساد و الدمار و الخراب ده و هنبدأ علي نضافة من جديد, بكرة ده مش بعيد, بس مش قريب, لسا احنا مش جاهزين ليه

الثورة لما تقوم مش هتكون خراب في الشوارع و الكثير من الجرحي و القتلي, لكن لما تقوم هتكون ثورة من نوع اخر, مش ثورة جياع, مش ثورة سياسيين, مش ثورة هتافات, الثورة اللي هتقوم ثورة ناس عايزة تعيش, نفسها تجرب الحياة اللي انت عمال تحرمها منها كل شوية و تقلل مستواهم الفكري و المادي و الاجتماعي كل يوم و تقلل من عقولهم و تعاملهم معاملة البهايم, الناس بتصبر علي لقمة العيش و بتقول الحمد لله, الناس بتصبر علي الظلم و بتقول ابتلاء ربنا و بكرة يتفك, لكن الناس مش بتصبر علي الحجر علي الافكار, لما متلاقيش الافكار بتطلع و ليها منفس, هيجروا ورا بعض في دماغ الناس, و لما تسيب الافكار في الدماغ بتخلل وتستوي, و لما الافكار تستوي و تستشري جوا دماغ البني ادم, بتخليه يعمل اي حاجة عشان يحققها, افضل ابني عماير و كباري و احفر ترع و عامل الناس علي انك شاريهم من سوق عكاظ باين و كانوا في تخفيض, الناس بتتشكي و بتنسي, ممكن تراضيهم بكلمتين حلوين كده ولا حاجة ولا زيادة مرتبات, بس كل مرة انت بتضربهم, زي ما بيخر سجدا ليك الملايين, فيه الالاف اللي بيتراكم في عقولهم الاهانات الفكرية المتكررة دي, و لما تفضل تخلي الناس بتخاف تفكر و بتخاف تتكلم, ده اسوأ من انك تجوعهم ولا تظلمهم, الناس هتنسالك الفقر بعد اول زيادة مرتب و هتنسي الظلم بعد اول قضية تتضبط, لكن انك تمنعني افكر, التهمة دي مش بتتنسي, ولما الناس تتعبي بما فيه الكفاية, هتتقلب اللعبة كلها, و كل اللي انت بتحاول تمنعه هيتقلب ضدك, بثورة من شكل اخر, انت مش خايف ان الناس تنزل الميادين و تثور, انت اصلا معتبرهم حشرات وهتموتهم و تحبسهم بسهولة, مش هيفرق معاك حاجة, لكن اللي انت بتخاف منه ان الناس دي  تبتدي تفكر, تبتدي تتناقش و تعمل شوشرة اراء

انت خايف من اللي بيبوظ القطيع بأنه يعرفهم ان فيه بدايل, وان القطيع ده مش احسن حاجة و ان فيه اكل برا المزرعة و ان المزرعة وسخة اصلا ميتعاشش فيها, انت ضعيف لدرجة ان الميادين مش هتأثر فيك, بس فيديو عاليوتيوب عامله انسان تافه سفاف اصلا بيرعبك و يخليك مش عارف تنام او مدونة فيها شخص بيفضفض تخليك مرعوب و خايف عالنظام, مش بيخوفك الفساد اللي بينهش في لحم البلد, لكن ثريد تويتس علي تويتر ممكن يتحول قضية رأي عام

لما النظام يخاف من تفكيرك, النظام ده اضعف بكتير من اننا نثورعليه بالميادين و الدم, و اتفه من ان حد يموت عشان يخليهم فرحانين, كل المطلوب الناس متبطلش تفكر, متبطلش تعرفهم انهم غلط, الموضوع مش محتاج ميدان ولا حاجة, الميمز بتخليهم مش عارفين يناموا اصلا

ثورتنا فعلا هي ثورة فكرية بحتة, مجرد وجودنا و اننا بنفكر و اننا مصرين نفكر و نتعلم و نزود وعينا ده كافي لوحده لانهيار النظام, ﻷنه نظام قايم عالخضوع و الذل و الانصياع الاعمي, التنوير والمعرفة البسيطة سلاح قوي جدا في مواجهة اي حاجة, و طول ما احنا بنفكر و طول ما احنا بنهري و بنفضفض و بنعترض, فالثورة مستمرة

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

A WordPress.com Website.

Up ↑

%d bloggers like this: