اشكالية التوحيد بين المسيحية والاسلام – الجزء الثاني

 

 

اشكالية التوحيد بين المسيحية و الاسلام
اكتر من 1400 سنة من الصراعات الفكرية و المسلحة ما بين اكبر ديانتين في العالم

*عشان اللي هيتخانق, الكلام في البوستات حيادي 100%, لا يعبر بالضرورة عن ارائي الشخصية و ايماني ب-ربنا, لكنه عرض حيادي للاديان بدون تحابيش كل دين عالتاني*

*اغلب المعلومات اللي هنا يعرفها المسلم في خامسة ابتدائي بس وجب الذكر من اجل حيادية عرض القضية*

‏‏اقْرَأْ وَرَبُّكَ الْأَكْرَمُ – الَّذِي عَلَّمَ بِالْقَلَمِ – عَلَّمَ الْإِنسَانَ مَا لَمْ يَعْلَمْ ‏[‏العلق‏:‏ 3 – 5‏]‏‏
ربنا مكرمش الانسان و علي مراتبه, الا عشان علمه, اداله العلم, فمينفعش المسلم يطفي دماغه, و يقرر يبطل يفكر, او يخاف يفكر و كل العبر و القصص و الحكم في الدين, “لأُولِي الأَلْبَابِ” اي اصحاب العقول, مش اللي منقاد وراء اي كلام يتقال يمشي يردده, و يكون شايل حاجات عظيمة, و هو جاهل برضه.

كَمَثَلِ الْحِمَارِ يَحْمِلُ أَسْفَارًا” , يعني زي بياع الكتب اللي بيبيع كتب كوانتم فيزكس و وهو معاه ابتدائية, زي العيل اللي بيروح كل يوم الكتاب يحفظ القران كله قبل الابتدائية, و متعلمش حقوق الانسانية البسيطة.

:البوست اللي فات

اشكالية التوحيد بين المسيحية والاسلام – الجزء الاول


 

(2) التعريف بالدين الاسلامي

بادئ ذي بدء, الاسلام هو اخر الديانات الابراهيمية الرسمية, ظهر في سنة 610 ميلادية, عن طريق وحي نزل علي راجل من اشرف عائلات قريش, اكبر قبيلة في مكة و العرب, الراجل ده هو “محمد بن عبد الله بن عبد المطلب بن هاشم”, زيه زي يسوع/عيسي, بيمتد نسبه لحد ابراهيم (حسب الرواية المسيحية), بس هما ولاد عم , نسب الرسول ممتد لحد اسماعيل بن ابراهيم, و نسب يسوع ممتد ﻷسحاق بن ابراهيم.

المهم, الاسلام ديانة بسيطة, برجماتية, بترفض كتير من مظاهر التمجيد الصوري للاله و الانبياء و الملايكة و اي حاجة, حتي تمجيد النص الديني الصوري مرفوض, الاسلام معناه “ان يسلم الانسان نفسه لله” اي ان يطيع الله في كل اوامره و يبتعد عن المحرمات, كل ده في سبيل الخلاص, الخلاص في الاسلام هو النجاة في الدنيا, و بعد الموت لما نبعث يوم الحساب, نخش للجنة.

فحضرتك كمسلم, بتبدل الدنيا الفانية, بالاخرة الباقية, ب-انك تتبع اوامر ربنا الموضحة في نصين فقط, الكتاب السماوي للاسلام : القران و احاديث الرسول المنقولة عنه, المنزلين و المرويين باللغة العربية اللي كان بيتكلم بيها اهل قريش, و نزل بيها ﻷنها كانت اكثر اللغات العربية تطورا و تعقيدا, كتابة و لفظا.

*اللي هيسأل هو فيه لغات عربية, اه يا جماعة فيه عدة لغات عربية, زي النبطية و السبئية والشمالية و الكندية بس انقرضت كلها ﻷن انتشار الاسلام وحد العرب علي لغة واحدة, بحروف واحدة, كلهم من عيلة اللغات السامية, اللي جه منها العربي و العبري و الارامي (الارامي لغة الكتاب المقدس الاصلية)*

: اركان الاسلام خمسة
– شهادة بوحدانية الاله وحدانية كاملة لا شك فيها ولا شرك, والايمان برسالة محمد رسوله اللي جه يبلغ بيه و يختم الانبياء
“اشهد ان لا اله الا الله, وان محمد رسول الله”

– الصلاة, و دي بتكون 5 مرات فرض يوميا, بنفس الطريقة بس طولها مختلف + صلوات سنة عن الرسول غير اجبارية لكن مستحبة + صلوات الاعياد و الجنازات و طلب الغوث و الاستخارة و الصلاة لمجرد حمد الله علي نعمه

– الزكاة, و دي نظام تكافل اجتماعي بيخلي الغني يدي الفقير جزء من فلوسه او اصوله او قوته..الخ بشكل سنوي ليه حسبة معينة بتختلف حسب الزمان والمكان و الظروف الاجتماعية و الاقتصادية.

– الصوم, اجباري شهر في السنة, انقطاع كامل عن الاكل و الشرب لجزء من اليوم, بهدف تنقية الروح و تدريبها علي التخلي عن الشهوات الحلال طوعا, و زيادة في تدريب النفس علي تجنب الشهوات الحرام, و جعل الانسان المسلم افضل و اكثر روحانية و قربا لله

– الحج, اجباري مرة في العمر, للي يقدر ماليا و بدنيا عليه, بيكون زيارة للبيت الرمزي لله في الارض, اللي هو الكعبة المشرفة في مكة المكرمة, عند ال سعود للاسف واداء شعائر رمزية الغرض منها تطهير الانسان من خطاياه و العودة ابيض و نقي كما ولدته امه.

: الطوائف الاساسية للاسلام

: السنة

و دي المذهب الاسلامي الاقرب للصواب, او الارثوذكسي يعني و بتؤمن بكلام الرسول كمكمل للقران, ومعاه الصحابة ك, بتنقسم للمذاهب الاربعة (الحنبلية – الشافعية – المالكية – الحنفية) ومعاهم/جواهم الفرق الكلامية, او المذاهب الباحثة في علم الكلام/علم التوحيد, زي الماتريدية و الاشعرية و المعتزلة و السلفية و الوهابية, و الفرق الروحانية اكتر زي الصوفية و اشباهها, ودول بيختلفوا في فهم النصوص الدينية و طرق تأويلها و تفسيرها و فهم صفات الله. لكن كلهم نفس الشئ اجمالا.

: الشيعة
اتباع شيعة علي بن ابي طالب, ظهرت ﻷسباب سياسية في السنة ال36 بعد الهجرة النبوية, بسبب خلاف بين علي (ابن عم الرسول) , وبين معاوية بن ابي سفيان, وادي الخلاف ده لظهور الشيعة و قدام شوية ادي لمقتل الحسين بن علي, بسبب ده تحديدا قامت الشيعة, بسبب حزنهم علي انهم اللي قتلوا الحسين تخليصا ليه من الالم اللي سببه ليه جنود معاوية و انهم شايلين ذنب قتله (بس مش موضوعنا ده حوار كبير لوحده).

 : و دول متفرعين
للاسماعيلية – الاثنا عشر امامية – الزيدية – الدرزية (مختلف في امرها اذا كانت سنة او شيعة) – العلوية

: تختلف السنة عن الشيعة رئيسيا في 4 حاجات 
طريقة تعاملهم مع صحابة الرسول – انهم بدرجة اقل من اهل بيت الرسول –
تقديسهم للحسين و علي لدرجة الالوهية في بعض الفرق –
اختلافات فقهية متعددة –
طريقة الصلاة و الصوم في بعض الطوائف –

: الاديان المتفرعة من الاسلام
كلها مبنية غالبا علي ان نبي الديانة هو المهدي المنتظر – اللي هو غالبا شبه اسطوري يعني

– البابية – ديانة ممهدة للبهائية – مندثرة حاليا –
– البهائية (ديانة حية) – موجود منهم حوالي 20 الف في مصر, بس الحكومة مش بتعترف بيهم وبتكتبلهم خانة الديانة شرطة –

 الاحمدية – ديانة حية –
السيخية –
القياديانية –

يذكر ان اول كلمة نزلت في القران كانت “اقرأ” دعوة عامة للتفكر في كل شئ, و القراية, “اقرا بأسم ربك الذي خلق” , افتتح كلامك كله بذكر الله, ذكر وجوده و وحدانيته, وتفكر فيه و في خلقه

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

A WordPress.com Website.

Up ↑

%d bloggers like this: